قوانين وشروط المنتدى
1/حياتس الله معنا في قوم هيط وهذي الساعة المباركة اللي خلتتس تتعوذين من إبليس وتسجلين معنا
وترانا هنا في قوم هيط ننبسط لاشفنا واحدتن جاية تبي الفايدة والوناسة يعني مانبي واحدتن همها التخريب وكل ماطق عود بحصاة (قالت الوعد بالطلعة )
وراحت تسجل بإسم ثاني وتسسسحب رجلينها وتذبب كلامن ماله داعي ..
2/حريصات جداً في منتديات قوم هيط أن نطلع على كل كبيرة وصغيرة ونلم بأكبر عدد من المشاركات وندقق فيها (ولكن العين ماتعلى على الحاجب )وبعض المرات مانقدر نسيطر على الوضع لذلك ترانا نُخلي مسؤوليتنا عن أي شيء ماله داعي وكل مايكتب يمثل وجهة نظر ورأي الكاتب فقط ..
3/ممنوع الكلام في الدين بشيء مو زين وسب الطوائف والتدخل في علوم المذاهب والثوابت والرموز الدينيةواللي تخل بهالشرط ذنبها على جنبها ..
4/للمشرفات الحق في نقل الموضوع أو صنفرته إذا كان بووه وسسخ :) ولهم الحق في حذفه إذا كان مخل بالشروط .. ولاتقولين ماعلمتوني !
5/قسمنا المنتدى إلى عدة أقسام شيء خاص للقصايد وشيء خاص للهبال والوناسة وشيء خاص لعلوم الحريم والخ من التقسيمات عشان كذا مانبي واحدتن تجي كاتبة موضوع تسب العميدة في قسسسم الطبخ وتجيك الثانية تبهرها وتحط موضوع ديني ببرحة اللعب كل شيء له مكانه الخاص وعقلتس براستس تعرفين تحطين الشيء المناسب في المكان المناسب واللي تخالف هالنقطة ترى موضوعها بيترقشع ونعلقها على باب المنتدى ونفشلها اربع شهور ونص !
6/الكلام اللي ماله داعي ماله داعي واللي داخله عشان تقل أدبها نبي نجتمع عليها حنا والمشرفات ونجلدها قدام الله وخلقه ,, وقد أعذر من أنذر !
7/ممنوع تكررموضوع بأكثر من قسسسم ترانا نفهم من مرة وحده
8/اللي تلاحظ على مشرفة ملاحظه ممنوع تشرشحها وتفتح موضوع قدام الله وخلقه فيه قسم خاص تفاهمين فيه مع الادارة وهم بيآخذون لك حقك
9/ممنوع تسسجلين بأسم مو واضح الرموز والخرابيط والطلاسم مانبيها واللي تسجل بهالشكل الغير واضح لاتلوم إلا نفسها إذا لقتنا مغيرين اسمها ومسنعينه لها هههههه
10/اسمعي ترى سجلتي معنا أوكي بس مانبي تسسسجيل ع الفاضي شاركي واستانسي مع الحريم ولايغلبنك بالمواضيع وترى هاااه اذا طولتي علينا فوق الشهر ماشاركتي بتنحذف العضوية وهذا علمن يوصلتتس ويتعداتس
11/مذهبنا مذهب أهل السنة والجماعة وإذا كنتي من بتوع القطيف وطقتهامالنا فيتس لزوم وترى المنتدى لايقبل أي صورة متفسسسخه ولا قليلة ذوق والموسيقى والمقاطع الغنائية ممنوعتن منعاً باتاً فاحترمي القوانين وخليتس حرمتن ذربة
, اضغط هنا للعودة للصفحة الرئيسية للمنتديات.
بالنقر على زر "موافق" أدناه، فإنك توافق على عدم نشر أي مشاركة تخالف قوانين المنتدى . وترى مالكي المنتدى لديهم حق حذف، أو مسح، أو تعديل، أو إغلاق أي موضوع لأي سبب يرونه، وليسوا ملزمين بإعلانه
..
وتذكري قول الله تعالى (( ما يلفظ من قول إلا لديه رقيب عتيد))
